నటుడు మోహన్ బాబు మీడియాకు వెంటనే క్షమాపణలు చెప్పాలి: సీ.పీ.ఎం. నేత

భీమ్ న్యూస్ ప్రతినిధి ఇందుకూరుపేట (డిసెంబర్ 11) తెలంగాణ హైదరాబాద్ నగరంలోని సినీ నటుడు మోహన్ బాబు ఇంట్లో నిన్న మంగళవారం జరిగిన కుటుంబ గొడవల్లో మీడియా ప్రతినిధులపై అనుచిత వ్యాఖ్యలు చేసిన మోహన్ బాబుపై కేసు నమోదు చేయాలని నెల్లూరు జిల్లా భారత కమ్యూనిస్టు పార్టీ అనుబంధ సంస్థ రైతు సంఘం అధ్యక్షుడు షేక్ షాన్ వాజ్ పోలీసులను కోరారు. నెల్లూరు జిల్లా ఇందుకూరుపేట మండలం డేవిస్ పేట పంచాయతీ పాగావారిపాలెం వద్ద ఉన్న డా. బి.ఆర్. అంబేడ్కర్ విగ్రహం వద్ద నిరసనలు చేపట్టారు. మోహన్ బాబు కొడుకు తన ఇంట్లోకి రమ్మని మీడియా ప్రతినిధులను ఆహ్వానిస్తే, వాళ్ళను అవమానపరిచి, దాడి చేయడం హేయకరమని దుయ్యబట్టారు. నటుడు మోహన్ బాబు వెంటనే మీడియా ప్రతినిధులకు క్షమాపణలు చెప్పాలని డిమాండ్ చేశారు. సమాజంలో ప్రతి అంశాన్ని ప్రజలకు తెలిపే జర్నలిస్ట్ ను అవమానించడం మంచి పద్దతి కాదని, ఈ విషయంపై జర్నలిస్ట్ సంఘాలు తమ నిరసన గళం వినిపించాలని కోరారు. ఈ నిరసన కార్యక్రమంలో ఇతర ముఖ్య కార్యకర్తలు పాల్గొన్నారు.