వేణుగోపాలస్వామి కళ్యాణం కరపత్రం ఆవిష్కరణ చేసిన గొండు శంకర్

భీమ్ న్యూస్ ప్రతినిధి గార (జనవరి 14) శ్రీకాకుళం జిల్లా సాలి హోండం కొండపై వెలసిన శ్రీ కాళీయ మర్దన వేణుగోపాలస్వామి జాతర కర పత్రాన్ని సోమవారం ఉదయం వేణుగోపాలస్వామి సన్నిధానంలో శ్రీకాకుళం శాసనసభ్యులు గొండు శంకర్ ఆవిష్కరించారు. ఈ సందర్భంగా శాసనసభ్యులు గొండు శంకర్ మాట్లాడుతూ ఎంతో విశిష్టత కలిగిన వేణుగోపాలస్వామి దేవాలయాన్ని, పక్కనే ఉన్న బౌద్ధ క్షేత్రమును అభివృద్ధి చేసేందుకు చర్యలు తీసుకుంటామని తెలిపారు. అభివృద్ధి చేసేందుకు సమగ్ర నివేదికను తయారుచేసి టీటీడీ దేవస్థానం ట్రస్ట్ ద్వారా నిధులు సమకూర్చి అభివృద్ధికి చర్యలు తీసుకొనుటకు కృషి చేస్తానని పేర్కొన్నారు. వచ్చే ఫిబ్రవరి 7 నుండి 12వ తేదీ వరకు జరగనున్న వేణుగోపాలస్వామి తీర్థయాత్ర కళ్యాణ మహోత్సవ కార్యక్రమాన్ని అందరమూ సమిష్టిగా విజయవంతం చేయాలని, భక్తులకు అవసరమైన సౌకర్యాలను ఏర్పాటు చేయాలని నిర్వహించిన సమీక్షలో పేర్కొన్నారు. తదుపరి స్వామి వారి ప్రత్యేక పూజలు నిర్వహించి హారతులు సమర్పించి స్వామివారి తీర్థ ప్రసాదాలను స్వీకరించారు. ఈ ఆవిష్కరణ కార్యక్రమంలో ఆలయ ధర్మకర్త సుగ్గు మధురెడ్డి, గార మండల ప్రజా ప్రతినిధులు, నాయకులు గ్రామ ప్రజలు, దేవాదాయ శాఖ అధికారులు, భక్తులు, మండల, స్థానిక తెదేపా నాయకులు పాల్గొన్నారు.