పిల్లల ప్రాణాలకు పొంచి వున్న ప్రమాదం: పట్టించుకోని అధికారులు

భీమ్ న్యూస్ ప్రతినిధి తోటపల్లి గూడూరు (ఫిబ్రవరి 03) నెల్లూరు జిల్లా తోటపల్లి గూడూరు మండలం వరిగొండ పంచాయతీ రావూరి వారి కండ్రిగలో మంచి నీటి పైప్ లైన్ వేస్తున్నారు. పైప్ లైన్ కోసం సీసీ రోడ్లు ప్రక్కన కాలువ గుంటలు తీశారు. గ్రామం అంతా పైప్ లైన్ పూర్తి చేశారు కానీ రెండవ వీధిలో సగం వీధికి పైప్ లైన్ వేయకుండా ఆపేశారు. రెండవ వీధిలోని ప్రజలు పంచాయతీ కార్యదర్శిని అడిగితే, RWS ఏ.ఈ. ని సంప్రదించాలని చెప్పారని, RWS ఏ.ఈ. ని అడిగితే త్వరగా పూర్తి చేస్తామని చెబుతూ పది రోజులు గడిచినా పట్టించుకోలేదని మీడియా ముందు వాపోయారు. గ్రామ పంచాయతీ పాలకవర్గం, గ్రామ అధికారులు ఒకరిపై మరొకరు చెప్పుకుంటున్నారని అవేదన చెందారు. కాలువలు తవ్వి, రోడ్డుపై మట్టి గుట్టలుగా వదిలేసిన కారణంగా చిన్న పిల్లలు ఆడుకుంటూ వెళ్లి జారి కాలువలో పడే అవకాశం వుండటం వల్ల పిల్లలకు ప్రమాదం పొంచి వుందని ఆందోళన వ్యక్తం చేస్తున్నారు. మంచినీటి పైప్ లైన్ పూర్తి చేసి పిల్లల ప్రాణాలకు పొంచి వున్న ప్రమాదాన్ని నివారించాలని, ఉన్నతాధికారులు స్పందించి వెంటనే చర్యలు చేపట్టాలని మీడియా ముఖంగా కోరుతున్నారు.