రాయలసీమ మాలల సింహ గర్జనకు లక్షలాదిగా తరలి రావాలి

భీమ్ న్యూస్ ప్రతినిధి చిత్తూరు (మార్చి 10) ఎస్సీ వర్గీకరణ చేయకూడదని, క్రిమిలేయర్ అమలు నిలిపివేయాలని మాజీ ఎమ్మెల్యే ఎం.ఎస్. బాబు డిమాండ్ చేశారు. వర్గీకరణ నిర్ణయాన్ని అమలు నిలిపివేయాలని కోరుతూ ఈ నెల 23వ తేదీన తిరుపతి మున్సిపల్ గ్రౌండ్ నందు జరగనున్న రాయలసీమ మాలల సింహ గర్జన కార్యక్రమాన్ని విజయవంతం చేద్దామని మాలలు ఐక్యత రాగాన్ని వినిపించారు. ఆదివారం చిత్తూరు బాన్స్ హోటల్ నందు మాలల సమావేశానికి ముఖ్యఅతిథిగా మాజీ ఎమ్మెల్యే ఎం.ఎస్. బాబు హాజరయ్యారు. ఈ కార్యక్రమంలో ఎమ్.ఎస్. బాబు మాట్లాడుతూ మాలల ఐక్యతని చూసి ఓర్వలేక కొన్ని దుష్ట శక్తులు మాల, మాదిగలను రెండుగా చీల్చేందుకు కుట్ర పన్నుతున్నారని తెలిపారు. మాలలు అడుగడుగున వివక్షతకు గురవుతున్నారని, దీన్ని ఎదుర్కోవాలంటే విద్యపరంగా,  ఆర్థికంగా అభివృద్ధి చెందినప్పుడే సాధ్యమవుతుందన్నారు. వర్గీకరణ అడ్డుకునేందుకు తిరుపతిలో నిర్వహిస్తున్న మాలల సింహగర్జనలో మాలల సత్తా ఏమిటో చూపాలన్నారు. ఇందుకు గాను లక్షలాదిమంది మాలలు తరలిరావాలని పిలుపునిచ్చారు. ఈ సమావేశంలో నాయకులు యమల సుదర్శన్, పుణ్యసముద్రం రవి, రాసన పల్లి ప్రకాష్, ప్రభాకర్, పరదేశి, ధనంజయ, ఉద్యోగ సంఘాలు నాయకులు రాఘవులు, దొరై కన్నన్, గణేష్, లక్ష్మి నారాయణ, జీవయ్య, మధు, దాము, రాజేష్, సత్యనారయణ మాల మహానాడు నాయకులు పాల్గొన్నారు.